Delhi Naiwieng 03:
Ka Myntri ka tnad ka rep ka riang ka Dr Ampareen Lyngdoh mynta ka sngi ka la pynbna ba ka lehkmen leh sngewbha kaba iadei bad ka jingpyni ia ki sap ki phong, ki jingshna ia ki tiar ki tar, ka put ka tem kaba la tip kum ka ‘Winter Tales, 2023 yn pynlong lai sngi ha Nan Polok, Shillong.
Ia kane ka Myntri ka tnad ka rep ka riang ka la pynbna ha Meghalayan Age-The Store ha nongbah Delhi.
Kane ka Winter Tales kan long naduh ka 14 ,15 bad 16 tarik u Nohprah, 2023.
Ia kane ka Winter Tales la plie pyrda ha u snem 2020 kum shi bynta ban khring bad ban plie lad ia ki briew ba donsap ban pyni nam ia ki jingshna jingthaiñ, ki jingbam, ka sap ban put ban tem.
Nalor kine, yn pyni ruh ia ki sap rwai jong ki paidbah ka jylla bad ia ki jingbam na kane ka jylla.
Ha kane ka sngi, ka Dr Ampareen ka la pyllait paidbah ia ka Almanak 2024 is ‘Meghalayan Scapes’.
Haba kren ha kane ka sngi, ka Dr Ampareen ka la pynpaw ia ka jingkmen ba ka jylla Meghalaya ka long kaba riewspah ym tang ha ka spah mariang hynrei hynrei naduh ka bam ka dih, ka put ka tem nalor kiwei de .
” Nga kmen palat ba lyngba ka jingdon jong ka Meghalayan Age hangne ha nongbah Delhi, la lah ban pyni ia ka sap ba ki paidbah ka jylla Meghalaya ki don” ong ka Dr Ampareen.
Ha kajuh ka por, ka la ai jingiaroh ia ka sorkar ba ka la leh bha bad iarap ia ki nongseng kam lajong ban lah ban trei ha la ki jong ki kjat. ” Ngam don jingbabe lada ka sorkar ka pyllut ha kum kine ki kam ban ai jingiarap,” la ong ka Myntri ka tnad ka rep ka riang.
