Wat ieit Jaidbynriew tang ha ki social media, leit knieh ïa ka khaïi na ki bar jylla, ka KHADC ka kloi ban iarap: CEM

Shillong, Lber 13 :

U Chief Executive Member ka Khasi Hills Autonomous District Council (KHADC) u Bah Pynïaid Sing Syiem u la kyntu ïa kito ki samla kiba ju mlien ban kynthoh ïa ka jingtreikam ka EC ba kim dei ban kren ieit Jaidbynriew tang ha ki rynsan social media, hynrei u la kyntu ba kin mih sha madan da kaba leit sha ki thaiñ khappud ban leit knieh ïa ka khaïi ka pateng na ki bar jylla, ha kaba na ka liang ka KHADC ruh ka kloi ban ïarap na ka bynta jong ki.

Ïa kane u Bah Pynïaid Sing Syiem u la ong haba jubab ïa ka motion ba la wanrah da u Bah Titostarwell Chyne MDC ka Sohra uba dei ruh u nongïalam ka liang ïatei halor ka jingeh jong ki paidbah ha ka liang ka kamai kajih ka rep ka riang nalor kiwei kiwei, ha ka dorbar mang tyngka kaba la poi noh sha kaba kut ha ka sngi Balang ka 13 tarik Lber 2024.

U Bah Pynïaid Sing Syiem u la kren da ka jingsngewkhia halor ka jingïoh lad ki bar jylla ban leh ïa ki kam khaïi pateng bad u la ong ba lada don ki samla kiba lah ban leh ïa ki kam khaïi pateng ka KHADC ka kloi ruh wat ban knieh noh ïa ka trading licence na ki bar jylla ban ïarap na ka bynta jong ki ba kin ïeng ha la ki jong ki kjat.